تجربة السنة الأولى طب وجراحة - 1442هـ - 2021م

اهلاً وسهلاً يا اصدقاء 

في 27 يوليو 2020 بدأت قصة رحلتنا ، أُولى خطوات تحقيق أحلامنا ، شغف مستمر وعطاء لا ينضب 

في هـ اليوم تحديداً كانت مشاعرنا مختلفة تماماً ؛ مشاعر فرح ، رضا ، سعادة وحب لأن جامعتنا اعلنت وبشكل رسمي " قبولنا في كلية الطب " ومن هنا بدأ المشوار العظيم ؛ وبسبب الجائحة العالمية الي أثرت علينا فـ قصّتنا بتكون مختلفة عن باقي الدفعات " يومنا الدراسي يبدأ واحنا بالبيت " 

السنة الأولى لنا كانت عبر منصة رافد ( البلاك-بورد الخاص بجامعتنا ) بالإضافة الى ان اغلب المحاضرات كانت مسجلة ومُوَحّده بين قسم البنين والبنات في كل المستويين الأول والثاني  

بدأ المستوى الأول لنا في الكلية والي يتكون من 6 مواد مقسمه على 15 ساعة وهي : 

اللغة الانجليزية 2 و 3 = 6 ساعات 

الابتكارات في الطب = ساعتين 

المهارات الطبية المهنية = ساعتين 

الثقافة الصحية = ساعة واحدة 

الثقافة الاسلامية 1 = ساعتين 

تقنية المعلومات = ساعتين 

بشكل عام كانت اكثر نصيحة توصلنا من الدفعات الي قبلنا (( ركّزوا على الانقلش لأنه راح يأثر بشكل كبير على المعدل )) بس هذا الشيء ما يخلينا نهمل باقي المواد 

لازم تكون عندنا القدرة على الموازنه بين المواد والجهد يكون موزّع بينها للحصول على اعلى التقديرات فيها 

طبعًا ليه نركز ع الانقلش؟ لانه الاكثر ساعات بالترم، اي ماده ساعاتها كثيره ركزوا عليها لانها تأثر بالمعدل

بدأنا نخوض تجربتنا ولكن كنّا نحس ان البداية كانت من الصفر ، كل شيء تغير وصار جديد ؛ النظام ، الدكاتره ، طبيعة المواد ، واللغة وكل شيء كان يصير في هذه المرحلة طبيعي جداً ومع الايام راح نتعود 

لا تتحطمون ابدًا ولا تقولون صعب علينا كل اللي عليكم تسوونه انكم تتعودون ع الوضع و"تنظمون وقتكم" و"تشوفون انسب طريقه للمذاكره" لان طريقه مذاكره الثانوي غالبًا مارح تنفع بالجامعه لازم طرق واستراتيجيات جديده، اسال اللي اكبر منك او اللي يجيبون درجات كويسه راح تستفيد بشكل كبير منهم، لو حصل وم قدرت تسأل احد تقدر تفتح في اليوتيوب طرق مذاكره لطلاب الطب

شي خلوه ببالكم طول فتره دراستكم للطب واللي هو: ((طبيعي انك م تجيب فل مارك او درجات عالية نفس الثانوي)) انت جالس تدرس طب من اصعب التخصصات عالميًا بس شد حيلك وبتقدر عليه، لا تتحطم ولا تسمح لأحد يحطمك هذا حلمك وانت جالس تحققه الحين انقص مره ومرتين تقدر تعوضها الاختبارات الجايه والسنوات الجايه بس زي م قلت لازم يكون عندك استراتيجية مذاكرة فعالة

طبعاً اللغة المعتمدة للدراسة في الكلية هي اللغة الانجليزية عدا المواد العامة ؛ مثل الاسلامية وال IT

وممكن اكثركم يتبادر في ذهنه سؤال ؛ هل اللغة عائق ؟! انا لغتي ضعيفة اقدر ادخل طب ؟! 

الجواب بيكون ؛ اللغة ابداً مو عائق ، والجميع ايًّا كان مستوى لغته يقدر يلتحق بالكلية 

وقت المذاكره كنّا نحاول احنا نترجم المحاضرات لأنفسنا عشان نكتسب المهارة وتتطور لغتنا اكثر ، ونحاول ما نترجم كامل الجملة ؛ نترجم الكلمة الي ما فهمناها ونحاول نفهم باقي الجملة من السياق 

بعطيكم نصيحة ذهبية ؛ وانتوا تذاكرون ركّزوا على اهداف المحاضرة وحاولوا تصيغونها كأسئلة وتجاوبون عليها لأن غالباً هي المطلوب من المحاضرة والي بتكون موضع اسئلة في الاختبار

طيب نجي الحين للمستوى الثاني واللي كان عبارة عن:

اول 8 وحدات من اللغة الانجليزية 4 = ساعتين

البحث والمقال = ساعتين 

الانجليزية التخصصية = ساعتين 

البريمد (كيمياء حيوية، فيزياء حيوية، احياء) = 9 ساعات

طبعًا هالمستوى كان كله عن بعد كنا نداوم عشان اللابات العملية وعشان الاختبارت يعني بالاسبوع مره واحيانًا مرتين لاب، ونداوم اذا فيه اختبارات او كويزز

للأمانه كانت ممتعه اللابات وكنا نتعرف فيها ع بعض لان المستوى الأول ماكنا نداوم الا بالاختبارت فكانت تقربنا لبعض مره، كنا ننبسط فيها ونعتبرها تغيير جو عن المذاكره ومحاضرات الاون لاين

طبعًا زي م قلنا لكم قبل نركز ع المديول الاكثر ساعات واللي هو البريمد، بالبدايه يعطونكم "تايم تيبل" يوضح لكم كل شي بالمديول المحاضرات لكامل الترم بالتواريخ باسماء الدكاتره وحتى مده كل محاضره

النصيحة الذهبية لهالمديول "لا تراكمون المحاضرات" كمية المحاضرات كبيرة جدًا بالنسبة للي اخذناه بالمستوى الأول، لو سحبتوا ع يوم م ذاكرتوا فيه ترا بيخرب عليكم يمكن لأسبوع أو أسبوعين مذاكرة قدام 

البريمد مافيه ميد نفس الانوفيشن(الابتكارات) والبروفشنال(مهارات)، لأن المحاضرات كثيرة صعب يختبرونا ميد واحد وفاينل واحد عشان كذا فيه ثلاثه كويزات وفاينل، طبعًا نصيحتي لكل كويز الاولى لاتراكم واقولها لكم للمره الثانيه، الثانيه هي شوف اكثر المحاضرات الداخله بالكويز وركز عليها لأن غالبًا راح تلقى الاختبار اغلبه جاي منها بحكم عددها الكبير، يعني مثلًا ببدايه البريمد اكثر المحاضرات كانت كمستري وبالفعل أغلب الاختبار كان كيمستري، لكن الفاينل كان اغلب المحاضرات فيزكس بالتالي كان فيه اسئله كثيير فيزكس وقيسوا ع كلامي، طبعًا عشان م تخافون لما تختبرون كويز خلاص قفلوا ع محاضراته لأن 99.99% مارح يرجعون يجيبونها لا بالكويزات الجايه ولا الفاينل كمان، بس كمان اسألو الدكتور أو الدكتوره المسؤولين عن المديول.

نصيحة كمان لا تنقص بالppl ولا sdl ولا seminars هذي خلي درجاتها بجيبك لأنك غالبًا راح تنقص بالاختبارات، "جمع درجاتك واضمنها" شد حييلك بالكويزات لان الفاينل غالبًا مهلك وتنقص فيه كثير خصوصًا انه جاي بعد تعب ترم كااامل ومعاه فاينلز مواد ثانيه، بس مو شرط يكون كلامي صح ممكن تجاوب في الفاينل اكثر من الكويز، لاتنسون احنا دفعه كورونا وقدّموا علينا الاختبارات عشان رمضان فممكن يكون فيه اختلافات بسيطه نفس كذا.

بنعطيكم نصائح اضافيه كمان واللي هي بعد كل محاضرة تذاكرونها حاولوا تراجعونها مع مجموعة من زملائكم وزميلاتكم لأن المذاكرة مع مجموعة تفرق كثثثييييير بقول لكم ليش ! 

فيه اشياء نكون فاهمينها بشكل خطأ او مو فاهمينها زين فلمّا نراجع ونذاكر مع مجموعة راح نتأكد من فهمنا لأهداف المحاضرة 

بالإضافة الى انه اي شيء يواجهكم ويكون صعب عليكم فهمه على طول روحوا لليوتيوب ؛ للأمانة اليوتيوب هو اكبر كنز بين يدّنا وممكن نستفيد منه ، بس اكتبوا اسم النقطة الي مو فاهمينها وبيطلع لكم عالم كبير من المعلومات 

وعشان تتأكدون انكم ذاكرتوا المحاضرة زين روحوا لقوقل واكتبوا اسم المحاضرة

 متبوع بـMCQs وراح تطلع لكم اسئلة منوّعة تختبر فهمكم وتأكد لكم فهم المعلومات ، لا تنسون ترجعون Google Drive الخاص بالدفعة الي قبلكم ؛ راح تستفيدون منه كثير من ناحية تجميعات الاختبارات وبنك الاسئلة والملخصات

خلصنا البريمد واتمنى من كل قلبي تشدون حيلكم فيه المديول مو سهل بس اللي يذاكر بيقدر عليه، نجي للماده الثانيه اللي احسها مهمه جدًا جدًا حتى للمدى البعيد، وكانت جدًا سهله وحلوه واللي هي الانجليزيه التخصصيه أو "المصطلحات الطبية"، راح تدرسون فيها بشكل عام اجزاء المصطلحات الطبية واسماء لاتينية مهمة في التشخيصات والحالات الطبية، طبعًا هالماده نتعرف عليها وندرسها بس مع الممارسة وكل م مشينا أكثر بالطب نصير بروفشنال فيها وتمر علينا مصطلحات اكبر واكثر من اللي درسناها

اما بالنسبة للمواد العامة اللي هي الانقلش العادي والبحث والمقال جيبو فيها A+ لانها سهله مره مره وحرام تنقصون فيها عشان معدلاتكم، هذي النصيحه خلوها ببالكم حتى السنوات الجايه عشان حرام تنزل معدلاتكم ع شي تافه وسهل وتقدر تجيب فيه A+ بالراحه بكذا نكون انتهينا من التعريف بالسنه الأولى اتمنى تكونون استفدتوا وتاخذون بنصائحنا عشان م تطيحون باللي طحنا فيه، اتمنى سنواتكم تكون مليئه بالنجاحات والفخر