تجربتي مع العزوبية

العزوبية هي حياة ثانية غير الحياة مع العائلة ..

تكون فيها أنت المسؤول عن نفسك ومافيه أحد يأمرك أو ينهاك، يمكن تواجهك بعض الصعوبات زي الغربة وعدم التأقلم.. ولكن راح تتعود على الوضع بالذات لو كان اللي تعزب معهم من زملاءك القدامى أيام المتوسطة أو الثانوية أو حتى بعض أقاربك من الطلاب..
تجربتي مع العزوبية كانت تجربة حلوة، عشت حتى الآن أربع سنوات من العزوبية ..
كانت السنة الأولى مع ولد عمي، عانيت في بدايتها من الغربة وماقدرت أتأقلم وكنت أفتقد عائلتي (يعني نفّست)، في السنة الثانية تخرج ولد عمي وانتقلت بعدها في السنة الثانية والثالثة والرابعة للسكن مع ٤ أشخاص من زملائي أيام المتوسطة وأولاد عمي،
في السنوات هذي قدرت أتأقلم وقدرت أنظم وقتي.. بالنسبة للتأقلم والتعود يختلف من شخص لآخر.. يعني مثلي أنا بالقوة تعودت، لكن فيه ناس أعرفهم .. من أول شهر تعودوا وبدؤوا ينظمون أوقاتهم..

بالنسبة لتنظيم الوقت، كان تنظيمي لوقتي كالتالي :
من يوم الأحد إلى الخميس :
أصحى من النوم مع صلاة الفجر وأسوي لي فطور .. أفطر وأقعد أطقطق على الكمبيوتر أو الجوال إلى الساعة ٧ ونص بعدها أروح الدوام..
من الساعة ٧ ونص إلى ٢ دوام في الكلية ..
بعدها أرجع للشقة وآخذ وقت راحة وغداء إلى الساعة ٤ ..
من الساعة ٤ إلى الساعة ٨ وقت المذاكرة وعمل البحوث والمتطلبات.. بعدها من ٨ إلى ١١ أبدا أسوي العشاء ونتعشى وبعدها أمارس هواياتي أو أشوف أفلامي المفضلة أو أشوف أفلام مع زملائي في السكن أو في بعض الأحيان نلعب البلوت إلى الساعة ١١ .. بعدها أروح للنوم حتى صلاة الفجر وهكذا

بالنسبة لأيام الإجازات كنت أرجع للأهل في القرية، ويوم الخميس والجمعة كانت مخصصة للترفيه والأفلام وأقابل فيها أصحابي، أما يوم السبت كنت أقضيه في مذاكرة مادرسناه في الاسبوع السابق..

بالنسبة للاختبارات، كنت أجلس في الشقة أيام الاجازة وأقسم المحاضرات اللي بنختبر فيها على عدد الايام ٣ أيام.. وأبدأ أذاكر..

نصايح أخيرة :
ترى حياة العزوبية ممتعة ومختلفة تماماً عن الحياة السابقة..
حاول أنك تطبع جدول تنظم فيه وقتك وتلتزم به..
أنا أشوف تنظيم الوقت هو مفتاح النجاح، ولا تنسى أنك تخصص وقت للترفيه وممارسة هواياتك، ووقت لقراءة القرآن،
اللي كتبته كانت تجربتي في العزوبية وترى مهو لازم أنك تطبقه بحذافيره،
بعد ماتجرب حياة العزوبية شوف كيف نظامك ووش اللي ترتاح معه أكثر .. المهم أنك تنظم وقتك ولايكون وقتك مفتوح..

تحياتي لكم وأسأل الله لكم التوفيق..

أسامة الزهراني
للاستفسارات .. حسابي في تويتر :
@ OSAMA_Z96